ஆயா

பத்தரை மாற்றுத் தங்கம் அவர் - பொருள்
போதாத போதும் மாறாத ஈகைக் குணத்திலே
வஞ்சம் இல்லா சிரிப்பிலே
வாஞ்சை கொண்ட வளர்ப்பிலே

வெள்ளந்தி மனம் கொண்டவர்
விவரமானவர்கள் பலரைக் கண்டிருப்பீர்
குழந்தை போன்ற குணத்தைக் கண்டதுண்டா?
வாரிக் கொடுக்கப் பாசம் உண்டெனில் பணம் எதற்கு?

கொல்லைப்புறம் கொன்னையூர் மாரியம்மன் கோயில்
நெஞ்சில் என்றென்றும் அம்மனின் நாமம்
நாவில் நாளும் அன்னையின் அருள் வாக்கு
வேறு எதுவும் வேண்டுமோ செல்வாக்கு?

செல்வம் குறைந்த போதும்
செய்தார் குறைவில்லாமல் பாலாபிஷேகம்
செல்வம் நிறைந்த போதும் எளிமை
செல்வோம் வாழ்வில் அவர்தம் வைராக்கியத்தோடு.

கவிஞர் கவிதா அக்காவுக்குப் பிறந்தநாள் வாழ்த்து

ஆலமரம் போன்ற குடும்பத்தில் முதலாவதாய்ப் பிறந்து
ஆயா வீட்டிலே அன்புடனே வளர்ந்து
சுற்றத்தாருடன் மகிழ்வுடன் பழகி
சற்றும் சளைக்காமல் வாட்ஸ்அப் குழுவில் பதில்கள் தந்து

ஆரோக்கியமாக ராகி, திணை, சாமை என
அறுசுவையாக ராப்பகல் தோறும் சமைத்து
தேமதுரத் தமிழில் புதுக்கவிதைகள் புனைந்து
தேகம் சிலிர்க்கும் ஓவியங்கள் வரைந்து

சால(மிக)ப் பல கலைகள் பிள்ளைகளுக்குக் கற்றுக் கொடுத்து
சாலா பெரியம்மா போல் சிறப்புடனே வளர்த்து
ஊக்குவித்து அனைவரையும் பாராட்டும் உங்களை
உறவுகள் கூடி வாழ்த்துகிறோம் வாழ்க பல்லாண்டு!

எங்கள் ஐயா

வெள்ளை வேட்டி வெள்ளை சட்டை தான் எப்போதும்

செல்வம் சேர்ந்தாலும் அலட்டிக் கொண்டதில்லை ஒருபோதும்

இரண்டாம் வகுப்பில் தான் ரயில் பயணம்

இரவு பகல் பாராமல் உழைத்துப் பெற்ற செல்வத்தில் என்றும் கவனம்

ஆறு பிள்ளைகள் மணம் முடித்துக் கொடுத்தவராம்

அறுபது அகவையிலும் நிறுவனத்தைத் திடமாக நடத்தியவராம்

சிறு வயதில் தந்தையை இழந்த போதும்

சீர்மிகு திறத்தோடு நிர்வாகம் செய்தவராம் 

தாய் தந்த தைரியமே மூலதனமாய்க் கொண்டு

தன் முயற்சியால் உலகத்தினை வென்று 

ஆக்கத்திற்கு அழுத்தமாகக் காண்பித்தீர்கள் சான்று

ஊக்கமாகப் பின்பற்றுகிறோம் பேரன் பேத்தியர் இன்று

அருள் ஆசிகள் வேண்டி வணங்குகிறோம்

28.11.2019

அக்காவுக்கு பிறந்தநாள் வாழ்த்து

தினம் காலையில் பம்பரமாய்ச் சுற்றி
பொறுப்பும் பொறுமையுமாய் வேலைகளைச் செய்து
தன்னைப்போல் சமர்த்தாய் பிள்ளைகளை மாற்றி
அன்பும் அரவணைப்புமாய் வாழ்க்கையைச் செய்து
இன்று போல் என்றும் மகிழ்வுடன் வாழ
இப்பிறந்தநாளில் வாழ்த்துகிறோம் வாழ்க வளமுடன்!

November 24 2019

ஆயா வீடு

ஒவ்வொரு ஆண்டும் கூடி களித்தோம் ஆயா வீட்டில்
ஓராயிரம் ஆட்டம் ஆடி கழித்தோம் அந்தக் கூட்டில்
திரைப்படம் விதம் விதமாகப் கண்டு களித்தோம் ஆயா வீட்டில்
திரைப்பா நிதம் இதமாகப் பாடிப் பூரித்தோம் அந்தக் கூட்டில்

சுற்றம் அகமும் முகமும் மலர நாமும் மகிழ்ந்தோம்
சுற்றும் உலகும் வாழ்த்த நாமும் வாழ்ந்தோம்
சற்றும் குறைவின்றி உண்டு களித்தோம்
காற்றும் சமையல் மணத்தால் நிறைந்திட திளைத்தோம்

உறவினர் கூடினால் கேட்கவும் வேண்டுமா
உற்றார் மகிழ்ந்திட நம் உவகைக்குப் பஞ்சமா
பணம் என்றும் கொடுத்ததில்லை இன்பம் - மற்றவர்
மனம் மலர்ந்தால் என்றென்றும் ஆனந்தம்

ஆண்டுக்கு ஒருமுறை மீண்டும் இணைந்திடுவோம்
சென்ற கால நினைவுகளை மீட்டு எடுத்திடுவோம்
நம்முள் என்றும் மங்காது பாசம்
நேரில் கூடினால் தேங்காது சந்தோசம்

Grateful and blessed

என் இதயத்தின் அரசியே வருக

ஏந்திழை வருகிறாள் நாடு கடந்து
காந்தமாய் ஈர்த்திடுவாள் வீடு புகுந்து
பாந்தமாய்ப் பார்த்திடுவாள் கூடு அடைந்து
சாந்தமாய்ச் சேர்ந்திடுவாள் காடு நுழைந்து

தாங்கிடுவேன் தோளில் அவள் சாய்ந்திட
தூங்கிடுவேன் மார்பில் அவள் சேர்ந்திட
வாங்கிடுவேன் கூந்தலில் மலர் நிறைந்திட
குலுங்கிடுவேன் மனதில் மகிழ்வு மலர்ந்திட

என் இதயத்தின் அரசியே வருக!
என் இல்லத்தில் அன்பு சிறக்க வருக!
என் உள்ளத்தில் உவகை பிறக்க வருக!
இன்ப வெள்ளத்தில் தினம் திளைக்க வருக!


----------------------------------

19.9.19
 அழகுவின் அமெரிக்க வருகையின் போது எழுதியது.
 நான்காவது வரி Florida காட்டைக் குறிக்கும்.

பொருள்:
ஏந்திழை
பாந்தமாய்
உவகை